خربشات من دفتري القديم بعنوان "نامي يا عيوني"

نامي يا عيوني نامي وسيبك من مآسي الأمة وتعرضها للتحقير والاستهزاء والاتهام
نامي وسيبك من اوجاع الناس وهمومها
نامي وانسي اللي مش لاقي لقمة ياكلها تسد جوعه.. أو شربة تروي عطشه
ما يهمك إنه غيرك نايم بالشوارع رغم قساوتها وبرودتها
نامي وسيبك من الطفل اليتيم اللي أخدوا الجيران عندهم ونيموا عالفرشة جنب رامي وعبد ومحمد وفراس وريم وفاطمة
هاي فاطمة بعدها بتبكي من وجع إيدها اللي انكسرت مبارح وهية بتلعب جنب الدالية
وما داووها لأنه الدكاترة مضربين والصيدلية ما عندها شاش والمستشفى مسكرة
نامي وانسي مرام اللي حلمها تفوت مدرسة متل باقي هالبنات بس ما معها حق دفتر أو مريول
نامي وانسي سليم اللي انأسر من عشرين سنة أو مصطفى اللي استشهد اليوم عشان لفظ كلمة "لأ" ورفض الركوع
نامي عشان ما تسمعي صرخات استنجاد الصبايا بالسجون أو أنين المرضى بالمشافي أو بكاء أم على فقيد

نامي عشان تصحي تصلي الفجر وتدعي ربك يوفقك ويسعدك ويهنيك ويغنيك

نامي بكرة وراكي موعد مهم عالفطور بعدين بدك تشوفي رفقاتك عالغداء

نامي لأن السهرة بكرة مطولة بالحفلة..مش ابن جيرانا نجح بالابتدائي!

عاملين حفلة والكل جاي يهني ويغني ويشاركهم الفرحة

نامي خليكي تكوني مرتاحة ومنورة بكرة

نامي يا عيوني نامي..

إطفي هالتلفزيون ونامي شو بدك بالأخبار كلها نفس اللي قبلها..

حلقاتها معادة وهالحلقة بالذات شفناها مبارح وقبل مبارح واللي قبله واللي قبله..

مش هدول نفسهم اللي تحت الحصار؟ بعده الحال متل ما هوة..والحرب الأهلية ماشية..

مش هدول همة اللي ما عندهم مي وكهرباء وبنزين وكاز ومواد غثائية وحكومة وأمن واستقرار..وحياة؟؟

مش هاد نفسه اللي منشوفه بحكي عن حل وحوار ومبادرة وسلام..

بعدين بوقع وبسلم وببوس وببتسم وبتصور وبرجع تاني يوم يعيدها؟

خلص لكان لشو أحضر وأسهر وأزعل وأنقهر وأبكي وأشكي..ما أنام أريحلي..

سيبك من هالحكي..

و نامي يا عيوني نامي